Көпбейінді облыстық аурухана ұжымы жоғары санатты хирург, «Денсаулық сақтау ісінің үздігі» Шуленбаев Абдулла Сыздықұлын 75 жасқа толуымен құттықтады.

Ақ халатты абзал жан 1973 жылдан бері ауруханамызда жемісті еңбек етіп келеді. Саналы ғұмырын Сыр медицинасының оның ішінде хирургия саласының дамуына арнаған ардақты Абдулла Сыздықұлының еңбегі ұшаң-теңіз.

Өз ісінің нағыз майталманы әр жылдары мемлекеттік медальдармен марапатталып, елдің алғысына бөленіп келеді. Өз қызметіне деген жауапкершілігі мен еңбекқорлығы оны «Алтын дәрігер», «Үздік дәрігер» атандырды. Н. Сызғанов атындағы Ұлттық ғылыми хирургия орталығы хирургияны дамытуға қосқан үлесі және еңбегі үшін «Алтын медаль» марапатын табыстады. Ел Президенті Қасым-Жомарт Тоқаев Абдулла Сыздықұлына өңір бойынша “Үздік дәрігер” наградасын табыс етті. Соңғы он жылда Абдулла Сыздықұлы лапароскопиялық әдіспен 1000-нан астам операция жасады. Аурухананың хирург дәрігерлерінің кеңесшісі ретінде өзінің практикалық тәжірибесін үнемі жас хирургтарға үйретті.

Оның көптеген шәкірттері бүгінде қалалық және аудандық ауруханаларда хирургиялық бөлімдерді басқарады.

Аурухана ұжымы бүгінде ардақты әке, абзал ата атанған Абдулла Сыздықұлын мерейтойымен құттықтап, зор денсаулық, отбасына бақ-береке тілейді.

Мерейтойыңыз құтты болсын, қымбатты дәрігер!