Ана мен бала денсаулығын қорғау – денсаулық сақтау жүйесінің басым бағыттарының бірі. Осы мақсатта мекемеде заманауи медициналық технологиялармен жабдықталған, жоғары білікті мамандар қызмет атқаратын бірқатар мамандандырылған бөлімшелер жұмыс істейді. Мұнда жүкті әйелдерге, босанушыларға, гинекологиялық науқастарға және жаңа туған нәрестелерге халықаралық стандарттар мен Қазақстан Республикасы Денсаулық сақтау министрлігінің клиникалық хаттамаларына сәйкес сапалы, қауіпсіз әрі тиімді медициналық көмек көрсетіледі.

Әрбір бөлімшенің қызметі ана мен баланың өмірі мен денсаулығын сақтауға, асқынулардың алдын алуға, заманауи диагностика мен емдеу әдістерін енгізуге, сондай-ақ пациенттерге жан-жақты медициналық және психологиялық қолдау көрсетуге бағытталған.

Гинекология бөлімшесі

Бөлімше меңгерушісі – Камзаев Айдос Әуелбекұлы.

Гинекология бөлімшесі – әйелдер денсаулығын сақтау мен қалпына келтіруге бағытталған мамандандырылған құрылымдық бөлімше. Мұнда заманауи диагностикалық және хирургиялық емдеу әдістері қолданылып, жоғары білікті медициналық көмек көрсетіледі.

Бөлімше 30 төсек-орынға арналған:

- 15 төсек – хирургиялық емдеуге;

- 15 төсек – консервативті емдеуге және медициналық көрсеткіштер бойынша жүктілікті үзуге арналған.

Акушерлік-гинекологиялық қызметтің тарихы 1925 жылдан бастау алады. Сол жылы Қызылорда қаласында 30 төсектік акушерлік-гинекологиялық бөлімі бар клиникалық аурухана ашылды. Кейінгі жылдары бөлімшенің материалдық-техникалық базасы нығайып, қызмет көрсету аясы кеңейді.

Гинекологиялық қызметтің қалыптасуы мен дамуына Қазақстанның еңбек сіңірген дәрігері М.Г. Егорова, сондай-ақ Т.Ф. Голубева, А.Т. Елемесова, М.В. Яковлева, Н.К. Давыдова сынды тәжірибелі мамандар зор үлес қосты.

Бөлімшеде трансабдоминальді және трансвагинальді ультрадыбыстық зерттеу, диагностикалық лапароскопия, гистероскопия, гистеросальпингография және барлық заманауи зертханалық зерттеулер жүргізіледі.

Мұнда жатыр мен оның қосалқыларына, аналық без кисталары мен ісіктеріне, жатыр миомасы мен эндометриозға, жатыр мойны патологияларына, жатырдың төмен түсуіне байланысты пластикалық операциялар және қынаптық жолмен орындалатын хирургиялық емдер жүзеге асырылады. Сонымен қатар лапароскопиялық әдіспен ұрықсыздықтың әртүрлі түрлері, жатырдан тыс жүктілік, аналық без және жатыр түтігі ісіктері, кіші жамбас ағзаларындағы жабысқақ процестер емделеді.

1998 жылдан бастап бөлімшеде эндоскопиялық хирургия кеңінен енгізілсе, 2010 жылдан бері жатырдың субмукозды миомасын емдеуде жатыр артерияларын эмболизациялау әдісі қолданылады.

Бөлімше Karl Storz және Richard Wolf компанияларының заманауи эндоскопиялық құрал-жабдықтарымен қамтамасыз етілген. Сонымен қатар физиотерапия, озонотерапия, плазмаферез және гипербариялық оксигенация әдістері кеңінен пайдаланылады.

Бөлім дәрігерлері санитариялық авиация желісі арқылы облыстың барлық аудандарына мамандандырылған көмек көрсетіп, кәсіби біліктіліктерін тұрақты түрде жетілдіріп келеді.

Нәрестелер патологиясы мен жансақтау бөлімшесі

Бөлім меңгерушісі – Бекжанова Индира Ерболатқызы, жоғары санатты неонатолог дәрігер.

Нәрестелер патологиясы мен жансақтау бөлімшесі – жаңа туған нәрестелерге тәулік бойы жоғары мамандандырылған медициналық көмек көрсететін ерекше бөлімше. Мұнда шала туған, аз салмақпен дүниеге келген және ауыр жағдайда туған сәбилерге барлық қажетті ем жүргізіледі.

Бөлімше құрамында:

- 6 төсектік нәрестелер жансақтау бөлімі;

- 14 төсектік жоғары тәуелді нәрестелер бөлімі;

- 30 төсектік арнайы күтім бөлімшесі жұмыс істейді.

Бөлім экстрагениталды патологиясы бар жүкті әйелдерден туған нәрестелерге және мамандандырылған көмекті қажет ететін сәбилерге қызмет көрсетеді. Санитариялық авиация арқылы аудандық медициналық ұйымдарға көмек көрсетіліп, облыс неонатологтары тұрақты кураторлық жұмыс жүргізеді.

Бөлімшеде ультрадыбыстық зерттеу, эхокардиография, функционалдық және зертханалық диагностика жүргізіліп, қажет болған жағдайда салалық мамандардың консилиумы ұйымдастырылады.

Акушерлік бөлімше

Бөлім меңгерушісі – Ержанова Арман Иманғалиқызы, жоғары санатты акушер-гинеколог.

Акушерлік бөлімше III деңгейдегі мамандандырылған акушерлік көмек көрсетеді.

Бөлім құрылымында:

- жалпы 70 төсек-орын;

- 30 төсектік акушерлік бөлім;

- 4 босану бөлмесі;

- босануға дейінгі бақылау бөлмесі;

- нәрестені тұрақтандыру бөлмесі бар.

Бөлімшеде экстрагениталды аурулары бар жүкті әйелдерге, жоғары қауіп тобындағы пациенттерге және күрделі акушерлік жағдайларға медициналық көмек көрсетіледі.

Облыс бойынша placenta accreta spectrum диагнозы қойылған жүкті әйелдерге жоспарлы жоғары технологиялық операциялар жүргізіледі. Соңғы жылдары жатырды сақтап қалуға мүмкіндік беретін метропластика операциялары сәтті енгізіліп, репродуктивтік функцияны сақтау бағытында маңызды нәтижелерге қол жеткізілді.

Жүктілер патологиясы бөлімшесі

Бөлім меңгерушісі – Хегай Алексей Викторович, жоғары санатты акушер-гинеколог.

Жүктілер патологиясы бөлімшесі 20 төсек-орынға арналған және экстрагениталды патологиясы бар жүкті әйелдерге тәулік бойы мамандандырылған көмек көрсетеді.

Бөлімшеде ауыр дәрежедегі артериялық гипертензия, жүрек-қантамыр, жүйелік, өт және зәр шығару жолдарының аурулары бар жүкті әйелдер ем қабылдайды.

Пациенттерге ультрадыбыстық зерттеу, доплерография, кардиотокография, электрокардиография және барлық қажетті зертханалық зерттеулер жүргізіледі. Қажет болған жағдайда мультидисциплинарлық топтың консультациясы ұйымдастырылады.

Қабылдау бөлімінде халықаралық Three H (3Н) триаж жүйесі қолданылады. Пациенттер медициналық жағдайына қарай жасыл, сары және қызыл аймақтарға бөлініп, қажетті медициналық көмек көрсетіледі.

Сонымен қатар бөлімде «SOS» жедел шақыру жүйесі енгізілген. Бұл жүйе арқылы анестезиолог-реаниматолог, акушер-гинеколог, неонатолог және зертхана мамандары шұғыл жағдайда қысқа уақыт ішінде жұмылдырылады.

Ана мен бала денсаулығын қорғау – үлкен жауапкершілік пен үздіксіз кәсіби дамуды талап ететін маңызды сала. Мекеменің гинекология, акушерлік, жүктілер патологиясы, нәрестелер патологиясы мен жансақтау бөлімшелері заманауи медициналық технологияларды тиімді пайдалана отырып, жоғары деңгейдегі мамандандырылған көмек көрсетуде.

Тәжірибелі дәрігерлер мен орта буын медицина қызметкерлерінің кәсібилігі, заманауи емдеу тәсілдері мен пациентке бағытталған қызмет көрсету қағидаттары ана мен нәрестенің өмірі мен денсаулығын сақтауға, медициналық көмектің сапасын арттыруға және өңір тұрғындарының сеніміне ие болуға мүмкіндік беріп келеді. Ұжым алдағы уақытта да кәсіби біліктілікті жетілдіріп, халыққа сапалы, қауіпсіз және қолжетімді медициналық көмек көрсету бағытындағы жұмыстарын табысты жалғастыра береді.